週日 3月 21, 2010 10:38 pm
2010-03-21╱圖文╱5656
差不多有三禮拜，56的尪婿因為龍骨有兩節變形壓迫著神經，逐工坐、倒、行路攏無法度的疼痛；尪婿這個毛病已有多年歷史，但一直以來疼的程度都只在可以忍受的範圍內底，所以從無去做徹底檢查治療。這次引發這爾嚴重的痛疼是因為閃到腰；真幸運透過朋友的介紹熟識了一位蔡醫師，經過了數次的治療痛疼已經減輕真濟。
蔡醫師是留德醫學博士（腫瘤外科），但伊現在的一般病治療卻是以漢醫為主西醫為輔助（漢醫是家傳），尪婿經過蔡醫師安排身體檢查了後，開始漢方以及調整龍骨的治療。
一禮拜有兩至三擺的治療過程中，尪婿佮蔡醫師成了忘年之交（蔡醫師還真少年），倆郎會有話講是因為珍惜台灣這塊土地的理念仝款。
蔡醫師講伊是228受難家屬，阿公兄弟佮舅公共有七位長輩，有魂斷228、有到綠島唱小夜曲（因為攏是帝國大學畢業回國的菁英）；蔡醫師的阿公自綠島返來了後，為著台灣民主賣田賣魚塭，到了臨去世前的遺言是：「莫怪阿公賣掉遐爾濟的地就只是為著一個遙遠的希望，相信有一工台灣人民偌家己選總統的時代來臨時，恁就會體會阿公的用心。」
了解蔡醫師的228家屬背景了後，就無難了解伊輕易放棄加州大學教學的機會，寧願回國繼承家傳漢醫守著小小魚塭的心情。
這幾冬來我在文字上從不涉政治方面的話題，是驚引起無必要的麻煩；尪婿在外頭做生意也絕不主動提起這個話題，除非熟識多年，知這位客戶的理念佮伊相仝。其實阮並無同意只用表面的色彩來抹阮熱愛台灣國的心情，阮總是無奈於台灣郎因為白色恐怖了後的驚惶而毋敢出聲，又包容心大、恨短、愛長的民族性；阮煩惱先人為台灣國的民主留血流汗、犧牲生命的苦難，所換來的民選總統的時代，就焉爾輕易又成了水沫！
電子報首頁