週三 6月 07, 2006 8:32 pm
來去苑裡華陶窯
來去苑裡華陶窯 歡喜甲睏未去的心情來去，
貯著淀淀的歡喜轉來，
有感恩，嘛有感動的情懷。
彼份窯主對土地的愛，
彼份頂真用心，赤土變成金。
彼份自然佮藝術的透濫，
彼份恬寂，涼風、空氣鮮尺芳閣甜。
彼份青蘢蘢，花蕊開，蝶仔飛，
鳥隻生跳跳唱兼念詩。
拄開的蓮花，親像思春的少女，
抹了薄薄水粉，勝過新月初出雲。
彼份紅磚，疊出台灣人的扑拚嚴硬古意的樸實，
彼份好禮，土親人親，割稻飯勝過燕窩山珍。
彼份土窯，燒出火炎山的美麗憂愁，生命光彩。
彼份粗瓷，捏出熱心、堅心，幼秀、巧氣、禪味。
對咱的土地就是愛有這款疼心的堅持，
參大自然做厝邊，毋願拋荒去，
若是有骨氣生活落去，
冬天過了，就是春天。
2006.06.05.
