週三 5月 03, 2006 4:37 pm
放送頭[hong3 sang3 thau5]作者翠苓
彼年，會記得是阮囡仔猶咧讀國小，六點外就起床，透早落來無人做伴的樓跤，拍開收音機陪伴我僎早頓，七點外送囡仔去學校，收音機有聲就好，內容放送啥無咧注意。
有一工，咧僎卜予囡仔出門的時，順手拵音響彼粒選台鈕仔，選著一個電台放送出來日本演歌「相逢有樂町」。即首輕柔的音樂，有我細漢時的溫暖記持，音樂放送無外久，聽著主持人的聲音，我人煞怢佇遐。聽著音樂就已經茫去矣，彼個人的聲，將我的心揪倒轉去三、四十幾年前，佇庄跤的囡仔時。共款的「相逢有樂町」、共款的主持人，三十幾年時空的流轉若像轉去原位無變，這是啥款的因緣啊！我因為驚喜、因為感動，規身軀毛管孔徛起來。
綴阿爸聽拉吉歐的年歲，是佇猶未讀冊的囡仔時；彼時中晝阿爸唯田裡轉來，總是準時十二點拵開「拉吉歐」，放送出來的片頭音樂是日本演歌「相逢有樂町」，然後主持人低低迷人的聲音響起，陪伴著阿爸過一個輕鬆的中晝，阮綴咧聽那捌那毋捌的廣播內容。
阮兜彼台「拉吉歐」是真空管的，關掉的時，足久真空管的燈火才會烕〔hua1熄滅〕去。因為彼台拉吉歐捌歹去，予修理電器的表兄提去修理了後，腹內佮喇叭箱仔煞鬥袂好勢，只好分開囥，嘛則予我看會著內面的燈管。拉吉歐的外表無水，伊的聲音卻是塞淀我真水的囡仔時。
三、四十年了後共款用「相逢有樂町」做片頭、無改變的聲音，著，就是被人尊稱做「永遠的放送頭──周進升先生」，廣播界的前輩。我一工一工共伊聽落去，才知影伊現此時佇台中每日廣播，早起時主持一個節目叫「櫻花俱樂部」，伊的聽眾為伊組一個「櫻花俱樂部後援會」，逐家稱呼伊「周部長」。節目內容有用日語報當日日本的新聞，閣用台語講一遍，放送的歌攏是伊親自去日本撿的音樂片，我愈聽愈有味，阿爸一定嘛真恰意，可惜電台佇台中，是中功率的，台北聽袂著。
後來去買空白的錄音帶，逐工透早錄一捆，錄夠十塊的時，寄轉台北予阿爸聽，相信阿爸一定會參我共款，倒轉去彼時佇庄跤的情景，雖然散赤、雖然歹過日，但是，有迹呢好的廣播陪伴阮行過彼段艱苦的日子。阿爸聽著我寄的錄音帶，參我共款的歡喜，阿爸講：經過迹濟年，放送頭的聲音一點仔都無變質，猶原赫呢好聽，彼種做代誌堅持的個性予人真感動。
阿爸佇台北，我佇斗六，阮同齊沈醉、享受即款溫純的記持。
節目聽成年了後，煞聽著主持人講伊想卜退休矣，人共伊留，伊講夕陽無限好，只是近黃昏。
聽著伊有退休的打算，我寫一張批去予伊，表達三、四十年了後佇空中重逢的感動佮歡喜，並且我將節目內容錄起來寄予阿爸的心情嘛講予伊知影。我參大都數的聽眾共款的心情，毋甘伊的聲音消失佇拉吉歐裡。我的確有較自私寡，老大人卜歇睏，我煞毋放伊煞揪椆椆。
無幾工，伊佇電台讀我彼張批，用「昔の名前で出ています」（咱台語翻唱歌名：流浪之歌）音樂做回批的音樂背景。是我本成就真恰意的一首日本歌，因為恰意，捌請教阿爸即首歌的意思，大約是咧講「佇京都的時，人叫我忍；佇神戶的時，我自稱號做渚；唯轉來到橫濱酒吧彼工開始，等待汝來揣我，所以用的是以早的字...」，即首歌旋律真優美、感動，加上主持人用迷人的聲音唸著我寫的批文，我的目屎忍不住澹目墘。啊！幾十年了後，放送頭猶原堅持用共款的片頭音樂，是毋是咧等伊忠實的老聽眾靠倚來欣賞咧？伊一定想袂到三、四十年前的聲緣，牽連到即當今。
原來伊唸的批毋但是感動了我家己，無幾工，有人寫批去予伊，講伊唸我彼張批，予人那聽目屎那滴......。
每一年年底，周部長會辦一場「卡拉ＯＫ」的演唱會，彼年，伊寄兩張入場劵予我，予我有機會去看著伊本人。參加演出的人攏是伊的聽眾，台跤滿座的觀賞者，嘛攏是伊的忠實聽眾，來自中部各所在的聽眾，客滿了員林文化中心的演藝廳。
節目進行當中，周部長唱兩首日本歌，雖然年紀已經七十歲左右，歌聲猶原響亮，我想講，伊無做歌星，將聲音分享大眾是一層可惜的代誌。當伊唱「母親的面容」的時，我看著伊的面有目屎滴落來，思念阿母的心情，借著歌聲深深感動著在座的聽眾！
第二年買票卜請阿爸去欣賞周部長的年終「卡拉ＯＫ歌謠會」，演出進前，我的大家煞來過身，彼工阮阿爸來共阮大家燒香拜祭，無去聽唱歌，阿爸講心情不對！長輩對生死的尊敬，是對性命的重視。古聖敎咱「里有殯、不巷歌」，長輩虔誠遵循，阮誠心學習。
佇掛心周部長無卜主持節目的心情下，阮繼續聽伊的節目，逐工攏像咧抾珍貴的寶貝彼款，用心咧聽伊的節目。人生的無奈，往往毋是咱掠會準的。我無法度擱再聽節目，並毋是主持人退休，是大環境的無允准。彼年新曆過年了後，拉吉歐安怎拵就是聽袂清每日廣播彼一台，對廣播音質略略仔吵雜就真無愛的我，聽著安呢的節目品質，寫批去請敎周部長，伊回批講，元旦開始，佇梅山加開一個電台，每日廣播的範圍是濁水溪以北，所以，伊嘛無法度要求人改善．．．。
聽節目被擾吵的情形嘛無蓋長的時間，就完全聽無伊每日廣播的聲音矣。除了無奈，猶有毋甘。
囡仔讀國中時，學校佇斗六的虎溪里遐，一擺落雨天我用車載伊去學校，車底的音響去予我拵著「櫻花俱樂部」的放送現場，有夠歡喜，車慢慢仔開、逗逗仔享受著迹爾仔出色的節目。可惜，轉到厝巷仔內底，就擱無聽著矣！彼時開始，我有一點仔等待著透早的落雨聲，因為落雨我就會用車載囡仔去讀冊，就會當閣聽著周部長的聲音。
陸陸續續佇片段的廣播內容當中，我知影尾後周部長一禮拜干礁主持拜四到拜六三工的節目爾爾，是半退休的狀態。囡仔現此時讀高中矣，落雨嘛卜家己騎鐵馬，無卜麻煩我即个阿母載伊去學校、因為安呢，我真少閣有機會聽著周部長使人懷念的聲音。
即馬厝裡拉吉歐幾何台，我總是毋死心，每一台我試拵98.7，無一台聽有每日廣播的聲音！厝裡幾何台完完整整的拉吉歐，煞較輸阮細漢時彼台骨肉分離的舊拉吉歐，所帶予我的快樂。拉吉歐用錢買會著，合聽的節目，是千載難逢啊！
想起彼台拉吉歐，中晝時綴著阿爸聽周進升主持的電台節目，暗時閣綴阿爸聽張宗榮先生主講的「武俠天下」了後，看阿爸關拉吉歐、關電火，真空管逗逗仔烕去，我才帶著當日的滿足佮對明日的期待，睏踮甜甜的美夢裡！一睏三、四十冬毋願卜精神！
2005/12/19
彼年，會記得是阮囡仔猶咧讀國小，六點外就起床，透早落來無人做伴的樓跤，拍開收音機陪伴我僎早頓，七點外送囡仔去學校，收音機有聲就好，內容放送啥無咧注意。
有一工，咧僎卜予囡仔出門的時，順手拵音響彼粒選台鈕仔，選著一個電台放送出來日本演歌「相逢有樂町」。即首輕柔的音樂，有我細漢時的溫暖記持，音樂放送無外久，聽著主持人的聲音，我人煞怢佇遐。聽著音樂就已經茫去矣，彼個人的聲，將我的心揪倒轉去三、四十幾年前，佇庄跤的囡仔時。共款的「相逢有樂町」、共款的主持人，三十幾年時空的流轉若像轉去原位無變，這是啥款的因緣啊！我因為驚喜、因為感動，規身軀毛管孔徛起來。
綴阿爸聽拉吉歐的年歲，是佇猶未讀冊的囡仔時；彼時中晝阿爸唯田裡轉來，總是準時十二點拵開「拉吉歐」，放送出來的片頭音樂是日本演歌「相逢有樂町」，然後主持人低低迷人的聲音響起，陪伴著阿爸過一個輕鬆的中晝，阮綴咧聽那捌那毋捌的廣播內容。
阮兜彼台「拉吉歐」是真空管的，關掉的時，足久真空管的燈火才會烕〔hua1熄滅〕去。因為彼台拉吉歐捌歹去，予修理電器的表兄提去修理了後，腹內佮喇叭箱仔煞鬥袂好勢，只好分開囥，嘛則予我看會著內面的燈管。拉吉歐的外表無水，伊的聲音卻是塞淀我真水的囡仔時。
三、四十年了後共款用「相逢有樂町」做片頭、無改變的聲音，著，就是被人尊稱做「永遠的放送頭──周進升先生」，廣播界的前輩。我一工一工共伊聽落去，才知影伊現此時佇台中每日廣播，早起時主持一個節目叫「櫻花俱樂部」，伊的聽眾為伊組一個「櫻花俱樂部後援會」，逐家稱呼伊「周部長」。節目內容有用日語報當日日本的新聞，閣用台語講一遍，放送的歌攏是伊親自去日本撿的音樂片，我愈聽愈有味，阿爸一定嘛真恰意，可惜電台佇台中，是中功率的，台北聽袂著。
後來去買空白的錄音帶，逐工透早錄一捆，錄夠十塊的時，寄轉台北予阿爸聽，相信阿爸一定會參我共款，倒轉去彼時佇庄跤的情景，雖然散赤、雖然歹過日，但是，有迹呢好的廣播陪伴阮行過彼段艱苦的日子。阿爸聽著我寄的錄音帶，參我共款的歡喜，阿爸講：經過迹濟年，放送頭的聲音一點仔都無變質，猶原赫呢好聽，彼種做代誌堅持的個性予人真感動。
阿爸佇台北，我佇斗六，阮同齊沈醉、享受即款溫純的記持。
節目聽成年了後，煞聽著主持人講伊想卜退休矣，人共伊留，伊講夕陽無限好，只是近黃昏。
聽著伊有退休的打算，我寫一張批去予伊，表達三、四十年了後佇空中重逢的感動佮歡喜，並且我將節目內容錄起來寄予阿爸的心情嘛講予伊知影。我參大都數的聽眾共款的心情，毋甘伊的聲音消失佇拉吉歐裡。我的確有較自私寡，老大人卜歇睏，我煞毋放伊煞揪椆椆。
無幾工，伊佇電台讀我彼張批，用「昔の名前で出ています」（咱台語翻唱歌名：流浪之歌）音樂做回批的音樂背景。是我本成就真恰意的一首日本歌，因為恰意，捌請教阿爸即首歌的意思，大約是咧講「佇京都的時，人叫我忍；佇神戶的時，我自稱號做渚；唯轉來到橫濱酒吧彼工開始，等待汝來揣我，所以用的是以早的字...」，即首歌旋律真優美、感動，加上主持人用迷人的聲音唸著我寫的批文，我的目屎忍不住澹目墘。啊！幾十年了後，放送頭猶原堅持用共款的片頭音樂，是毋是咧等伊忠實的老聽眾靠倚來欣賞咧？伊一定想袂到三、四十年前的聲緣，牽連到即當今。
原來伊唸的批毋但是感動了我家己，無幾工，有人寫批去予伊，講伊唸我彼張批，予人那聽目屎那滴......。
每一年年底，周部長會辦一場「卡拉ＯＫ」的演唱會，彼年，伊寄兩張入場劵予我，予我有機會去看著伊本人。參加演出的人攏是伊的聽眾，台跤滿座的觀賞者，嘛攏是伊的忠實聽眾，來自中部各所在的聽眾，客滿了員林文化中心的演藝廳。
節目進行當中，周部長唱兩首日本歌，雖然年紀已經七十歲左右，歌聲猶原響亮，我想講，伊無做歌星，將聲音分享大眾是一層可惜的代誌。當伊唱「母親的面容」的時，我看著伊的面有目屎滴落來，思念阿母的心情，借著歌聲深深感動著在座的聽眾！
第二年買票卜請阿爸去欣賞周部長的年終「卡拉ＯＫ歌謠會」，演出進前，我的大家煞來過身，彼工阮阿爸來共阮大家燒香拜祭，無去聽唱歌，阿爸講心情不對！長輩對生死的尊敬，是對性命的重視。古聖敎咱「里有殯、不巷歌」，長輩虔誠遵循，阮誠心學習。
佇掛心周部長無卜主持節目的心情下，阮繼續聽伊的節目，逐工攏像咧抾珍貴的寶貝彼款，用心咧聽伊的節目。人生的無奈，往往毋是咱掠會準的。我無法度擱再聽節目，並毋是主持人退休，是大環境的無允准。彼年新曆過年了後，拉吉歐安怎拵就是聽袂清每日廣播彼一台，對廣播音質略略仔吵雜就真無愛的我，聽著安呢的節目品質，寫批去請敎周部長，伊回批講，元旦開始，佇梅山加開一個電台，每日廣播的範圍是濁水溪以北，所以，伊嘛無法度要求人改善．．．。
聽節目被擾吵的情形嘛無蓋長的時間，就完全聽無伊每日廣播的聲音矣。除了無奈，猶有毋甘。
囡仔讀國中時，學校佇斗六的虎溪里遐，一擺落雨天我用車載伊去學校，車底的音響去予我拵著「櫻花俱樂部」的放送現場，有夠歡喜，車慢慢仔開、逗逗仔享受著迹爾仔出色的節目。可惜，轉到厝巷仔內底，就擱無聽著矣！彼時開始，我有一點仔等待著透早的落雨聲，因為落雨我就會用車載囡仔去讀冊，就會當閣聽著周部長的聲音。
陸陸續續佇片段的廣播內容當中，我知影尾後周部長一禮拜干礁主持拜四到拜六三工的節目爾爾，是半退休的狀態。囡仔現此時讀高中矣，落雨嘛卜家己騎鐵馬，無卜麻煩我即个阿母載伊去學校、因為安呢，我真少閣有機會聽著周部長使人懷念的聲音。
即馬厝裡拉吉歐幾何台，我總是毋死心，每一台我試拵98.7，無一台聽有每日廣播的聲音！厝裡幾何台完完整整的拉吉歐，煞較輸阮細漢時彼台骨肉分離的舊拉吉歐，所帶予我的快樂。拉吉歐用錢買會著，合聽的節目，是千載難逢啊！
想起彼台拉吉歐，中晝時綴著阿爸聽周進升主持的電台節目，暗時閣綴阿爸聽張宗榮先生主講的「武俠天下」了後，看阿爸關拉吉歐、關電火，真空管逗逗仔烕去，我才帶著當日的滿足佮對明日的期待，睏踮甜甜的美夢裡！一睏三、四十冬毋願卜精神！
2005/12/19
