週日 4月 02, 2006 10:28 pm
永遠的愛～碳空感動人的故事
早前佇瑞芳碳空閣咧挖煤碳的時，有一工一位碳工無細膩磕著無爆炸的炸彈，當場碎骨分屍予炸死去，怹厝的人干礁得到一筆少少的撫恤金，怹某承受著翁婿別世的痛苦時，閣愛面對未經濟生活的壓力，伊無半項技藝，嘛毋知佮讀國小的囡仔是欲按怎活落去！
拄咧操煩的時陣，工頭來看怹，建議伊到礦場賣早點來以維持生活，伊只好做了一寡扁食，透早就到礦場做生理，第一工開市，來了十二個人客，隨著時間的經過，燒滾滾的餛飩扁食吸引了誠濟人客來交關，生意較好的時，也有五、六十人，生意痞時，著算是落雨天或者寒天人至少嘛有十二人。
時間一下久，碳工的某囝攏發覺翁婿每工早起做空課進前，攏愛去遐食一碗扁食，怹較想嘛想無，就想欲查探清楚，甚至跟隨去質問翁婿，攏揣無著答案。有的妻囝亦閣家己款早頓予翁婿用，結局翁婿亦是去遐食一碗扁食。
閣佇一擺的意外發生，工頭嘛被炸成重傷，臨終的時對伊的牽手講：「我過身了後，請汝會當代替我，每一工去遐食一碗扁食，這是阮共一組碳工同伙的約定，朋友過身啊，留下幼囝芷某，除了阮，閣有啥人會當幫助彼對可憐的母仔囝咧？」自彼陣從此了後，扁食攤加了一位女眾的身影，佇來來去去無閒的人群當中，唯一無變的是彼十二個人絕對未減少。
時光過得那咧飛，一目匿（ni），碳工的後生已經大漢，碳工的牽手鬢邊毛嘛攏變白嘍，不過，這位食盡苦湯的老母，猶原用真歡喜真客氣的笑容來招呼每一位人客，來交關的人客，著算少年的代替年老的，查某的代替查甫的，毋過從來無少過十二的人，經過十幾年的歲月滄桑，十二粒愛心猶原金鑠鑠光焱焱。
彼時陣，想欲幫贊過身去共伴的某囝，十二的人的約束，彼種關懷的心，一直流傳落去。人世間有了這一份真情，是偌呢仔溫暖，予人是偌呢仔大的鼓舞。存好心、做好代，隨緣、隨力、著時，毋免的確一定愛利益著濟濟濟的人不可，對咱身邊仔做起，關心幫贊別人，準講干礁是一個人爾，嘛真偉 大，盡心、盡力的幫贊別人，功德不少！量毋免濟，心誠上重要！
