週二 3月 28, 2006 7:47 pm
戇人的枴仔
有一個阿戇仔，人誠戇直，定定予主人氣甲強欲死。一工，主人送伊一支枴仔，閣講：「假使世界上有人比汝閣較戇，汝就會使將這支拐仔送伊，因為舉這支枴仔的人，就是世界上上戇的人。」
「我敢赫戇？我是世界上上戇的人嗎？哇…….。」阿戇仔雖然人戇，夆叫做世界第一戇，嘛會傷心大聲哭，哭假若牛咧，自按呢逐工攏心肝頭偓促。雖然經過幾落冬，阿戇仔猶是揣無比伊閣較戇的人，彼支世界上上戇的枴仔，猶原佇伊的手底。
有一工，管家忽然間對逐家講：「主人破病真沉重啊，逐家緊來去看主人最後一面！」
主人看著工人攏來看伊，主人就講：「恁逐家攏到齊啊，我的病恐驚未好，定著會參恁分開，去到遠遠的所在。」
「主人！汝講欲去遠遠遠的所在，奚是啥乜所在？」阿戇仔猶原舉著彼支世界第一戇的枴仔真關心請問伊的主人。
「就是別的世界啊」主人回答講。
「別的世界？佇佗位？」
「我猶未去過，毋知是佇佗位？」
「汝這擺一去，偌久才欲轉來？」
「大概未閣轉來啊！」
「汝既然欲去旅行，所有的物件敢有準備好勢？」阿戇仔一直問。
「無，我無準備啥貨，嘛毋知卜紥啥！」
「主人！我將這支世界上上戇的人的枴仔還汝，因為汝欲去旅行，煞家己毋知欲去佗位，嘛無一點仔準備。像汝這種欲去遠位，閣毋知欲去佗的人，世界那有人比汝閣較戇咧？」
老、病、死是人人愛行的路，未來汝欲去佗？準備好亦未？假使在生無累積福慧的資糧，往生是欲對佗去？若親像彼個糊塗的主人，有啥乜理由未接受這支世界上第一戇的枴仔咧？
