週五 3月 10, 2006 6:55 pm
百鳥在樹，不如一鳥在手
深山底樹林內，有一隻老虎他已經餓幾落工，腹肚扁扁扁，氣力強卜無去。拖著沉重的跤步，沿路一直揣，揣（找）看有動物通塞喙（嘴）空無，一面想：「唉！敗市（不景氣），食物攏走對佗（那裡）藏，一隻胡蠅蚊仔嘛無！」
才按呢想爾，雄雄看著一隻兔仔拄好佇一欉大樹跤的石頭頂睏，老虎仔心內一陣歡喜，跕跤躡手（躡手躡腳）踏向前，當伊伸出利劍劍的跤爪，兔仔就卜掠到手，青定白定（突然）一隻野鹿對伊的後壁面閃身走過，老虎仔心內想：「兔仔一隻赫細隻，卜食嘛無沓無屑（微不足道），卡輸一隻鹿仔，會當予我食甲飽嬰嬰，亦是迮（jiok4追）鹿仔卡實在。」
心念一動，手勼轉來（縮回來），對野鹿仔走去的所在起跤迮。彼隻野鹿仔佇樹林內浪溜嗹（遊蕩），無張無持拄著老虎仔已經驚一下十二條神魂散了了，走假若飛咧拚命逃生。這聲看著老虎仔迮來，是驚甲屎尿泄泄出來，趕緊彎來斡去下性命走。
老虎因為枵饑失頓，閣是大箍把（肥胖），走一睏久，已經無力頭，大氣喘未離，姑不二三將（不得已）行慢落來，頓垂頓垂，心肝想講：「無魚
，蝦嘛好！掠無著鹿仔，嘛亦有兔仔通度飽！」倒轉來大樹跤卜揣兔仔，兔仔已經走甲無影跡！
故事的含意是咧講「百鳥在樹，不如一鳥在手」，卡白的講法就是「一隻鳥仔掠在手，卡贏十隻歇在樹」。人佮老虎共款，定定攏會「食碗內，看碗外」，得隴望蜀，得寸進尺。這款情形俗語內底有一句話形容甲真鬥搭（貼切）：「一塊才入肚，一塊喙那哺，一塊佇半路，閣一塊佇盤仔底顧！」，正港是「心肝卡大過牛肺」！
一山看過彼山懸，嫷花在別人欉，嫷某在別人房，用心計較追求別項，煞疏忽把握、珍惜身邊已經有的。貪心，時常予人失去的閣卡濟，失去了後才發覺、才後悔，才知以前所有的是寶貴，反悔卡遲。
「百鳥在樹」，歇在樹尾頂的鳥仔濟濟濟，雖然閣卡大隻閣卡嫷，毋過卜總掠到著，敢有赫簡單，是比喻咱追求的理想佮目標雖然真宏大，毋過大部分是一條路若天（長路漫漫），真歹達成或者實現。
「不如一鳥在手」，卡輸先將掠會著的，先掠到手，雖然這隻鳥仔無夠大、無夠嫷，毋過到手的卡實在。若是看未上目，放棄毋去掠，或者掠著放伊去，往往目睭看咧粿，跤踏著火（瞻前不顧後），想貪戴雞籠（因小失大），甚至也失去本來所會當掠著、所有的，雙頭無一耦〔ngauh4〕（雙頭落空）。
故事是教咱人，愛踏實，先將目睭前的鳥仔掠到手，關予好勢。若卜閣掠卡濟，才閣去下手，一步棋，一步著（按部就班），才是妥當。學會曉上進，嘛愛學會曉珍惜這陣所有的，用心去享用，去繼續經營。時時感恩這久所有的，正是咱發展的底蒂（基礎），咱發達的酵母。2006.03.10.
